منتدى طلاب وطالبات الجامعة السعودية الإلكترونية

منتدى طلاب وطالبات الجامعة السعودية الإلكترونية (https://www.alseu.com/)
-   قسم نقاشات كلية العلوم الإدارية والمالية (https://www.alseu.com/f2/)
-   -   كل مايتعلق بالتدريب التعاوني (تجربتي) (https://www.alseu.com/t30852/)

shahd_fahd 10-06-2020 12:16 AM

كل مايتعلق بالتدريب التعاوني (تجربتي)
 
6 مرفق
السلام عليكم ورحمة الله وبركاته
أولًا مبارك لكم هذا الإنجاز ووصولكم لختام المسيرة الجامعية 2222222
في هذا الموضوع حعطيكم تجربتي من الألف للياء.
تنبيه: اللي حياخذوا التدريب في الصيف ممكن يكون فيه أشياء مختلفه زي الأوقات والمدة.

377777
طبعًا حتبدأوا تبحثوا عن أماكن تدرب الطلاب شركات, معاهد, مكاتب الخ ممكن تبدأوا بالبحث قبل حتى ماتنزلوا مادة التدريب واللي على رأس العمل أيضًا تأكدوا إذا مقر عملكم حيدربكم في تخصصكم. أنصحكم تسألوا الأستاتذه اللي في الغالب يكونوا مشرفين على التدريب حيفيدوكم بأسماء جهات وأيضًا أبحثوا في تويتر فيه كثير حسابات مختصة بهذا الشي وبعض حسابات نشر الوظايف أيضًا تنشر فرص التدريب.
*طلاب وطالبات التجارة لما تبحثوا عن تدريب لا تبحثوا بمسمى تجارة إلكترونية فقط تقدروا تبحثوا عن تدريب تسويق, ويب ديزاين, سبلاي تشين ولوجستيك الخ يعني أي شي يشمله تخصصنا*

377777
لما يبدأ الترم حتسجلوا المادة وبعد كذا تطلبوا من مشرف/ة التدريب يعبي النموذج(موجود في المرفقات) حتحصلوه في الخدمات الطلابية في خانة "طلب تدريب تعاوني" تأكدوا أنه يكون مختوم وأيضًا إيميل المشرف يكون إيميل العمل مو إيميله الشخصي. حيكون فيه خانه في البلاك بورد ترفعوا فيه النموذج وإذا مشرفكم الأكاديمي لسا مافتح هذي الخانة أرسلوها إيميل للمشرف/ة الأكاديمي وأيضًا أرسلوها لإيميل التدريب caf.coop@seu.edu.sa
بعد كذا مشرفكم الأكاديمي حيأكد تدريبكم إذا كل المهام في النموذج مناسبة والنموذج مكتمل وتقدروا الان تبدأوا تدريب.
*إذا بدأ الترم ولسا ماحصلتوا أماكن تدريب عندكم إلى 3 أسبوع إذا ماحصلتوا جهة ألغوا الكورس( الأفضل بلغوا مشرفكم قبل يمكن يساعدكم.

377777
في المرفق فيه ملفين مكتوب فيهم coop هذي الملفات من صفحة الجامعة ضروري تطلعوا عليها فيها كل التفاصيل.

377777
شيء مهم جدًا إنكم تدونوا كل شي حصل بالتدريب من أول يوم حتى لو أحاديث جانبية أو شي حسيتوا إنه غير مهم عادي سجلوا كل شي صار يوميًا هالشي حينفعكم كثير في كتابة التقارير وأيضًا تقدروا تاخذوا بعض الصور تضيفوها للتقرير. ممكن تخصصوا نوت صغير أو في الجوال أو زيي إعتمدت على اللاب توب كان بالنسبة ليا أسرع للتدوين.

377777
مطلوب منكم تقارير إسبوعية عبارة عن جدول تعبوه (في المرفق ملف للتقرير الإسبوعي) في الغالب ماتنطلب بشكل إسبوعي ممكن يطلب مشرفكم مثلًا تحطوا كل إسبوعين بجدول والتسليم يكون نهاية التدريب زي ماصار معايا.

377777
حيكون فيه ميتنق عالبلاك بورد مع مشرفكم الأكاديمي ضروري تحضروها حتى إذا ماعندكم استفسارات.

377777
في نهاية الترم على ويك 13 أو 14 حيكون تسليم الفاينال ريبورت + البرزنتيشن.
بالنسبة للفاينال ريبورت في ملف في المرفق فيه كل شي يخص الفاينال ريبورت لكن حطوا في بالكم مو مطلوب منكم تجاوبوا على كل الأسئله اللي هما حاطينها(أرفقت لكم تقريري تقدروا تطلعوا عليه) بالنسبة ليا إتبعت هذا الترتيب
1-كفر بيج (ضيفوا توقيع مشرف التدريب سواء توقيع إلكتروني أو صوره)
2-فهرس
3-ملخص بسيط
4-عن الشركة (خدماتها, الموقع, عنوانها, الرؤية والرسالة, الشعار, بدايتها, فروعها, ممكن تتكلموا عن الموظفين وأعدادهم عن مشرفكم عن الأقسام, عن الناس اللي ساعدوكم خلال تدريبك وإيش مناصبهم, عن شركائهم وعملائهم الخ)
5-المهام اللي أنجزتها (أهم بارت ركزوا عليه صح مو شرط تكتب بشكل يومي إيش كنت تسوي ولكن أذكروا كل شيلا تختصروا بنقاط رئيسيه)
6-تقييمي وإنطباعي وإيش إستفدت والمخرجات
7-خاتمة

377777
بالنسبة للبرزنتيشن ماحطوا لها فورمات معين زي الريبورت بس أهم نقطة لا تكتبوا كل شي في العرض وتخلوه زي الريبورت + مو شرط كل الكلام اللي بتقولوه تكتبوه عالسلايد لأن حيكون مزعج أثناء العرض<وجهة نظر, غطوا النقاط اللي موجوده في الريبورت لكن إختصروها بنقاط رئيسية مرتبه وطبعًا برضوا ركزوا على المهام أكثر شي(أرفقت لكم البرزنتيشن حقي تقدروا تاخذوا فكرة) أنصحكم تحويل ملف الباوربوينت إلى pdf يكون أرتب أثناء العرض بالذات إذا كنتوا حاطين تنسيق وصور زيي عشان تظهر بنفس التنسيق عالبلاك بورد خلوها pdf. اختاروا فايل بعدين export واختاروا pdf. بالإضافة مو شرط كل اللي ذكرتوه في الريبورت يتذكر في العرض أو العكس, في نقاط ذكرتها في العرض لكن ما تطرقت لها أبدًا في الريبورت والعكس.
*بعد ماتخلصوا ممكن مشرفكم يسألكم كم سؤال أو يناقشكم في شي إنتوا ذكرتوه أثناء البرزنتيشن*
*بالنسبة لوقت العرض ذاكرين في الفايل يكون نص ساعه بس الأفضل تسألوا مشرفكم الأكاديمي بعضهم يحددوا الوقت والبعض عادي أهم شي تكوني أعطيتيه حقه, أنا عرضي مع مناقشة الأستاذه أخذ تقريبًا 12 دقيقة.

تنبيه:
*لا تنسخوا من بعض لأن على التقارير والبرنتيشن بلقريزم*

377777
على نهاية فترة التدريب حيرسلوا لمشرف/ة التدريب نموذج لتقييمكم حيكون عليه 50 درجة وال 50 الباقيه
10 على حضور ميتنق البلاك بورد + التقرير الإسبوعي
10 على حضور المشرف لمقر التدريب(بالنسبة لوضعنا أجزنا قبل إنتهاء فترة التدريب بسبب كورونا فما كان فيه زيارة بس ما أدري هل اللي قبلنا كانوا المشرفين يزوروهم أو لأ)
20 على الفاينال ريبورت
10 على البرزنتشين

هذا الرابط فيه نماذج كثيره لتقارير وبرنتيشنز:
https://drive.google.com/drive/u/0/f...13&direction=a

هذا كان كل شي ولله الحمد
شاركوا رابط الموضوع مع غيركم إذا استفدتوا
لاتنسوني من صالح دعائكم.2222222

Abdurrahman 10-06-2020 09:46 AM

شكراً لك على المشاركة الجميلة
على وقتي ماكان فيه تقديم Presentation كان فقط فيه تقرير

حاب انبه على شي مهم جداً
الطالب لازم يكون جاد جداً في التدريب الصيفي، في مقر عملي تم توظيف اكثر من خريج وخريجة بسبب انهم كانو مبدعين فترة التدريب.
مر علينا طلاب كانو مهملين جداً وبس يبغاك تسمح له يروح البيت!


الساعة الآن 06:54 PM

Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO 3.6.1 TranZ By Almuhajir

Security team