السلام عليكم،
أول شي: أنا كنت عضو في هذا المنتدى بس ما قدرت أسوي إستعادة لكلمة المرور لأن الإيميل المُسْتَخْدَمْ هو إيميلي الجامعي وما حأقدر أفتحه لأني تخرجت من الجامعة.
ثاني شي: موضوعي هذا مشابه لموضوع كتبته في المنتدى الرسمي الأسبوع الماضي بس المنتدى الرسمي صار عطلان.
ثالث شي: قبل ما أبدأ، خل أعطيكم معلومات عني.

________________________
الإسم: عبدالإله فلاته
العمر: 31 سنة
التخصص: تقنية معلومات
بداية الدراسة: سبتمبر 2012
تاريخ التخرج: نوفمبر 2018
تاريخ المقابلة: يناير 2019
تاريخ بداية وظيفة: مارس 2019
المعدل: 2.06 من 4.00
________________________

خل أتكلم عن المعدل. من أسباب سقوطه هو أني ما كنت أسلم الواجبات في وقتها وفي مرات يروح علي واجب وآخذ عليه صفر (المدرس ما عطاني صفر، أنا أخذت الصفر). السبب واضح؛ ما نظمت وقتي عدل. بس، على الأقل، كنت أعتمد على نفسي وأتعلم من أخطائي. كل ما أكتشفت أخطاء فِيْ، درستها وعدلتها. وكل ما أعدل في نفسي، بأصير أفضل من أول.

لهذا السبب كنت أنصح الطلاب بأن لا يِخَلُّوا أحد يحل لهم واجباتهم ولا كويزاتهم والآن وصلت لدرجة أن يخلون ناس تحضر محاضراتهم الإفتراضية. هذا ما يصب في مصلحتهم. المفروص يخلوا الجامعة فرصة للتعلم و اكتساب الخبرات وتصحيح الأخطاء. بس للأسف في ناس تتهمني بالتحدث عن مثالية مزيفة وأني أتفلسف والحقيقة هي أني ما اتكلم عن شي إلا وشفت إيجابياته.

لحد يحسب أني ما قاد رسبت في حياتي. إللي ما يعرفني، أنا (وأعوذ بالله من كلمة أنا بس تحملوني شوي) كنت مبتعث في كندا ومن إخفاقاتي هي أني رسبت في مستوى من مستويات الإنجليزي. وعلى فكرة، لحد يحسب أن المعهد إللي درست فيه علمني كل شي في الإنجليزي. أنا كنت محور العملية التعليمية وأقولها بدون مزح ولا استهزاء. أنا كنت محور العملية التعليمية.

99.9999999999999% من إللي أتعلمته كان من مجهودي الشخصي. كنت أشتري كُتُبْ و أسمع الراديو و أحاول أكتب قطعة بالإنجليزي وأعطيها المدرسين حتى يصححوها لي. ما أستنيت أحد يجيني ويقولي "وش تبغا تتعلم؟" ولا "أبغاك تصير أفضل من أول" ولا "لا تخاف. حأجيك كل أسبوع وأقيمك."

طيب يمكن يجيني شخص ويقولي "هذي أيام الإنجليزي بس المرحلة الجامعية أصعب." الصراحة، أنا أستمتعت بالمرحلة الجامعية هناك لدرجة أني لما أخذت مادة الجافا، كان المدرس يسأل أسئلة وكنت أحاول أجاوب قبل بقية الطلاب. طلعت الوحيد إللي يجاوب. يعني تخيلوا سعودي واحد غطى على الكنديين وجنسيات ثانية؟ شكل السعودي متفوق على كل الجنسيات!

طيب نجي على الواجبات أيام دراستي في كندا. للأسف، كان معظم طلاب الهندسة (سواءً كنديين ولا جنسيات ثانية) ينقلوا الواجبات من نموذج بحكم أن الهندسة "صعبة". المهم، أنا رحت لطلاب هندسة أعرفهم وكانوا ينقلوا الحلول من نموذج. المهم جلست عندهم وطالعت في سؤال من أسئلة الواجب ولقيته يشبه مادة المصفوفات نوعاً ما. طلعت دفتري وحليت إعتماداً على معلومات قريبتها من كتاب مادة المصفوفات. بعد ما حليت، شيكت الحل، وطلع حلي صح. على فكرة، أنا كان تخصصي هناك "علوم كمبيوتر" (يعني لو أنا بغيت أتعلم الهندسة، كان أتعلمتها كهواية).

من إخفاقاتي الثانية هي أني جبت 2 من 40 في مادة الفيزياء. خل أقولكم السالفة. كان عندنا مُدَرِّسَة فيزياء وكان كل الطلاب إللي درسوا عندها يِشْهَدُونْ بأن أسئلة الميدتيرم إللي تحطها هي عبارة عن سؤالين وما قاد تغيروا أبد لسنوات (أظن الأرقام هي إللي تتغير). المهم، واحد من السعوديين عطاني وعطى سعوديين ثانيين نموذج إختبار قديم مع طريقة الحل وقلنا عن سالفة إختباراتها إللي ما تتغير. المهم، أنا ما طالعت في الأسئلة .

رحت السكن الجامعي و حطيت الورقة في الدرج (أو أني حطيتها بالمقلوب على مكتبي وما فتحت الورقة خير شر). حاولت أذاكر بس ما قدرت لأسباب شخصية .

جا وقت الإختبار وجلست ساعة ونص أحاول أحل سؤال واحد. انتهى وقت الإختبار وأنا كنت خايف من الرسوب وكنت متأكد من أني حاجيب صفر. المُدَرِّسَة عطتني 2 من 40.

أتقابلت مع السعوديين وسألوا بعض كم جبت في الفيزياء؟ إللي جاب 38 و إللي جاب 39 وإللي جاب الدرجة الكاملة. أنا قلتلهم عن درجتي وأتفجعوا! قالوا ليه؟ قلتلهم أني دائماً أحاول أجيب الدرجة الكاملة بجهودي وما أعتمد إلا على نفسي. وجاك الإنتقاد. وأظن أن رفضي للإعتماد على النموذج هو إللي وفقني في الحصول على وظيفتي الحالية من بعد الله (الله أعلم).

طيب نجي على سالفة الوظيفة. أنا كيف أكتسبتها؟ أنا كنت متدرب فيه مقر وظيفتي. وكان معي متدربين (two trainees) من كلية و تخصصهم شبكات. لو تحطوني جنب الطالبين وتقارنوا بينهم وبيني، حتاخذوا طلاب الكلية لأنهم:
- أتدربوا على Windows Server داخل الكلية.
- أتدربوا على الدعم الفني داخل الكلية.
- هم أفضل مني في الشبكات وأنا نقطة ضعفي هي الشبكات.
- إذا واحد من الموظفين سأل عن مصطلح معين، أنا أقول ما أعرفه وهم يقولوا إيه.
- درسوا الـ CCNA داخل الكلية وأنا ما قدا درستها في حياتي.
- أظن أن معاهم شهادة الـ CCNA.
- أظن معدلاتهم أعلى من معدلي.

بس إيش إللي ميزني عنهم؟ خل أقولكم إيش كنت أسوي هناك.

لما أحضر مقر التدريب، كنت أستأذن موظفين تقنية المعلومات إذا يسمحولي أراقب إللي بيسووه. محد قلي لأ بس إذا كانوا مشغولين مراً، كانوا يعتذروا لي. طبعاً، أنا كنت أسأل أسئلة إذا ما فهمت إللي بيسووه بس حاولت ما أكثر أسئلة لأن أسئلتي كثيرة. إذا كثرت أسئلتي، أحاول أطلع الإجابة من جوالي. بمعنى ثاني:

أنا كنت محور العملية التعليمية.

ما أستنيت أحد يجي يعلمني. أظن هذي هي طبيعة التدريب الصيفي. إجهزوا لها يا طلاب المستوى السادس!

تصدقون؟ يمكن إللي ميزني عن المتدربين إللي من الكلية هو أن صارت مشكلة في مقر التدريب وكانوا محتاجين توصيلة كهرباء لإجتماع مهم. أنا حليت المشكلة بدون توصيلة الكهرباء.

أنا فكرت خارج الصندوق. شكله واجب الهندسة .

يمكن هذا هو إللي خلاني أكتسب الوظيفة من بعد فضل الله.

على فكرة! المقابلة ما كانت مقابلة. كان عرض وظيفي وكانوا محتاجين ثلاث حاجات: صورة من بطاقة الأحوال + شهادتي الجامعية + نسخة من سيرتي الذاتية

وحأختم الموضوع بنفس الطريقة إللي ختمت بيها موضوعي في المنتدى الرسمي:
مرة، واحد عطى مدير عندنا سيرة ذاتية لواحد. المدير قال: "الرجال يشتغل؟"

في تفاصيل ما ذكرتها وحأذكرها في وقت ثاني.

الله يعطيك العافية
موضوع جميل ورائع

فعلاً مشكلة الكثير يفكر بالنجاح وبأي طريقة ولا يهمه التحصيل العلمي اللي بيفيده كثيراً في حياته المهنية

اشكرك جداً على المشاركة عطتني الكثير من الأمل, لدي سؤال وهو هل تستطيع المقارنة بين دراستك هنا بهاذي الجامعة والدراسة بالخارج من ناحية الصعوبة والمحتوى وجودة المعلومات. انتظرررر ردك

ماشاء الله عليك، قصتك جدا محفزه وجات بوقتها، بالتوفيق لك في وظيفتك وعقبالنا.

حأنزل موضوع ثاني فيه قصة نجاحي وقصة فشل بعض الطلاب.
(تم إرسال المشاركة عن طريق الجوال)

كتبت أجزاء كثيرة في موضوعي الثاني ولسى بأراجعه. يمكن حيخلص نهاية يوم الجمعة.