السلام عليكم ورحمة الله وبركاته
رجعت لكم من أرض الملعب مباشرة مع ترم مذهل ... ترم متفجر ... يارباااااااااااااه كم أنت رائعة أيتها المعلوماتية
احم احم طبعاً رجعت مرة ثالثة اكتب تجربتي عن لفل 6 الاحترافي >> بعرف ما حدا كان مستنيني ...الله يسامحكم
... مابعرف ليش بيصيبني كسل اكتب فورا عن اللفل بعد ما خلصه
يلا نبدأ بدون مقدمات طويلة .... بسم الله الرحمن الرحيم
==================
الترم هاد عبارة عن 6 مواد على
حسب الخطة ... 3 مشتركة و3 تخصص
المشتركة:
اسلام ISLM 103
تجارة الكترونية E-COM 101
تقنيات الويب IT 230
التخصص:
ادارة مشاريع تقنية المعلومات IT 270
نظم ادارة قواعد البيانات IT 344
ادارة انظمة الشبكات IT 340
نبدأ كالعادة بالسهل ونتدرج للصعب فالأصعب >> حركات فصحى
=================
ثقافة اسلامية ISLM 103
لسى ما أخذتها
... لأنه الشعب كانت فل ... بس راح احكي عنها على هوا ما سمعت من البنات
بداية ... قالوا أنها أصعب ثقافة من بين الأربعة المقرر علينا
... فحاولوا لا تأجلوها متلي وخذوها بوقتها مشان الفلات اللي بعد بتكون أصعب ومافي مجال تركيز كبير على مواد كتيرة
موضوعها بشكل عام عن النظام الاقتصادي بالإسلام ... و من مواضيعها :
الأنظمة المالية .. التأمين .. الصكوك .. غسيل الأموال .. البورصة ... الخصخصة ... العولمة ... البيوع ... التنمية ...الخ
يعني فيها كمية حفظ ودسمة بشكل كبير ... هاد غير عن النظام الجديد اللي منزلينه لتحصيل ال 25 درجة أعمال الفصل .. كل أسبوع في واجب بعلامة وكمان لوحات مناقشة ومدري شو
... يعني حتى المواد السهلة صار بدها شغل
==================
التجارة الالكترونية ... ( E-COM 101 E-Commerce )
المادة مو صعبة أبداً وبالعكس للناس اللي بتحب تاخذ معرفة عامة بالتجارة هي أحسن شي ... كانت ممتعة بالنسبة لي ومعلوماتها منها مكرر من مواد تانية ومنها جديد ... حبيت كتير طريقة ربط المعلومات اللي عم تقرأها بأرض الواقع ... يعني أخيراً حدا فهمان كاتب كتاب دراسي ممتع ومفيد من الجلدة للجلدة
طبعاً وكل شي ممتع وحلو لازم يخربوه و ينعمل له إن وكيف وكان ولعل ...
قصدي بالاختبار و الأسئلة .. المادة بدها حفظ ظ ظ ظ ظ ظ مشان تجيب فيها A+ << هاد صدى مشان التاكيد هههههههههه
المادة 12 شابتر ... بتحكي بشكل عام عن مفاهيم التجارة الالكترونية .. أنواع المودل لها ... البنية التحتية لها ... الأمن وطرق الدفع ... التسويق ... المشاكل القانونية والأخلاقية والاجتماعية ... بعدين 4 شباتر لطرق تطبيق عملي
الدراسة بتكون من السلايدات والTB بشكل أساسي كالعادة ... بس أنا خرقت العادة
... ليش ؟ لأنه TB طويل فما لحقت اقرأه أيام الاختبارات و لانه بعض الأسئلة اجت من نقاط مختصرة جداً بالسلايدات والكتاب طويل وماراح تقدروا تفتحوه أيام الاختبارات .. فمن فين درست؟ ... رحت كالعادة ساويت مصطفى واخترعت طريقة جديدة
>> لا داعي لشكري هههههههه
بنهاية كل شابتر بالكتاب في شي اسمه review على شكل اسئلة وأجوبتها ... درستها بس هي مع أسئلة الواجبات وتوكلت على الله ... والحمد لله ما خاب ظني طلعت هي أفضل طريقة فاعتمدوها لو ما حابين تدوخوا بمصادر كتيرة
وبضمنكم تجيبوا A وما فوق بإذن الله
====================
تقنيات الويب (IT 230- Web technologies )
مادة البرمجة لهاد الترم ... طبعاً لا غنى لنا عن البرمجة صح أيها الآيتيون ؟؟
كم لغة كانت ... بظن 9 كلها مدمجة بكورس واحد
(HTTP, XHTML, CSS, JavaScript ,PHP Servlets, XML, JSP, Database, JSP )... طبعاً ما علينا من هيك ضغط وعدم ترتيب وانعدام حسن ادارة لتدريس المادة ... لأنه برأي الشخصي كل لغة من هدول بحر ...و لازم تكون بكورس لحالها
المهم هي المادة بتمسكوها من أول الترم أول بأول بتدرسوها وبتطبقوا كالعادة ... بدون تطبيق بتصير كأنك ما مريت عليها وموضعك صفر على الشمال بلا قيمة بين المبرمجين ... على الأقل المحترفين منهم
الدراسة من السلايدات المعدلة لأمنية و الTB ... من مقاطع يوتيوب عربي انجليزي اللي بتحبوه ... من الموقع الرسمي ل W3Schools كتير حلو ومرتب الموقع ... من خلال تطبيقكم تقريباً ثلاثة أرباع المنهج بيكون انهضم والباقي حفظ
التطبيق العملي من خلال البرامج اللي راح تستخدموها
أولاً : notepad ++ << بشكل مبدئي لتطبيق أول الشباتر المتعلقة بالHTML .. أو أي برنامج تحرير لها
ثانيا : برنامج ampps << عبارة عن سيرفر مع sql داتا بيس مشان تطبيق أكواد الphp مع الجافا سكربت
ثالثا : مايكروسفت سيرفر مع مجموعة خدمات للويب ... أو مدري شو كان اسم البرنامج بالضبط ... لتطبيق الservlet وأشياء تانية كمان
المهم البرامج اللي لازم تستخدموها بتنزل لكم أسمائها من اللي راح يدرسكم وعليكم تتعلموا وتتطبقوا بس
ولا تنسوا التطبيق ثم التطبيق ثم التطبيق ... التكرار بيعلم احم احم الشطار !
... خدوا المادة كتحدي حتى لو شغلها كتير لأنها أساس لكم بعدين بمشروع التخرج بالسنة اللي بعدها وبحياتكم العملية
=================
ادارة مشاريع تقنية المعلومات (IT270- IT project management)
المادة متعلقة بالإدارة وسماجتها بس لمشاريع التقنية
وهاد الشي بكرهه كتير بمواد الإدارة ... كمية الحفظ ضخمة فيها
بس الحلو فيها بالنسبة لي الجزء المتعلق بالتطبيق على برنامج MS project management ... لأنه على هوا ما عرفت اللي بيتخصص فيه بيصير فوق الريح ... قرقش كتير يعني
بتنزلوه من الموقع الرسمي لمايكروسفت ويمديكم تشتغلوا عليه طول الترم بالفترة التجربية ... الشغل على هاد البرنامج بيكون للواجبات المطلوبة وهي 5 مشاريع صغيرة ... طبعاً من فين بتتعلموا التطبيق ؟ من الكتاب بنهايته موجود ملحق Appendix للتعليم عليه ... عليكم تقرأوه وتطبقوا على هوا المطلوب منكم ... أو افتحوا من يوتيوب مقاطع بالعربي أو الانجلش وتعلموا عليه
حابة نبه على شي ... ما بعرف ليش معظم الطلاب تجاهلوا الواجبات وأخذوا فيها أصفار بس لأنهم مو عارفين يطبقوا على البرنامج ... يعني ليش هيك
وبالنهاية رسوب بالمادة ...مع انه لو قعدوا اتعلموا خلال يومين ثلاثة بيطبقوا المطلوب ... فلا تتجاهلوها هي بالنهاية 25 علامة وبتأثر كتير بنجاح أو رسوب
الدراسة من السلايدات 12 شابتر والTB كافية ... في أجزاء تطبيق مسائل بالسلايدات موجودة على شكل صور ... لا تتجاهلوها لأنها لها قوانين وطرق حل ومدري شو بتجيبوها من الكتاب ... بتجي سؤال بالاختبار عليه من فوق ال 5 علامات >> هي قلت لكم مشان ما تنصدموا متلي
====================
نظم ادارة قواعد البيانات ( IT 344-Database management systems )
المادة بناء على اللي درسناه بمقدمة لقواعد البيانات IT244 ... قلت لكم لا تتجاهلوا شي أو تدرسوه أبو
أي كلام
بس المادة مستوى أعلى من المقدمة ... وفيها أشياء بظن حتى بحياتنا العملية ما راح نستخدمها ... بتحكي عن index, hash , transactions, optimization, كلها مواضيع مختصة بالوصول للبيانات بأسهل الطرق بالنظام وباقي المواضيع النظرية
المادة 12 شابتر ... الدراسة من السلايدات فقط بشكل أساسي مع فهم أجزاء التطبيق العملية من الدكتور نفسه أو من اليوتيوب ... ويوجد TB مختصر فقط لأسئلة الاختيار مهم أيضاً ... مع الواجبات
======================
ادارة انظمة الشبكات ( IT 340- Network Management )
ما بقدر قول غير لا حول ولا قوة إلا بالله
... بدون تحطيم ولكن لإيصال الحقيقة فقط ... أسمج مادة ممكن تمر عليكم بالتاريخ البشري ... ليش ؟؟؟؟
المادة ما لها لا رأس ولا رجول ولا يدين ولا شعر
... ما في طريقة تقدروا تفهموها أو تمسكوها منها للأسف
ما بعرف من أي كوكب جاية هي المادة ... كتابها معفن ... سلايداتها أعفن ... واجبات الله يستر علينا بلا نحكي
بتحكي عن أشياء غريبة الأطوار بالشبكات ... المادة كلها كأنها مانوال أو جايد لتزبيط اعدادات الراوتر عندك بالبيت ... هههههههههه ما عم امزح جربوها وعطوني رأيكم لو فهمتوا منها شي أو اطلعتوا بفائدة تذكر
المهم بالاستبيان الليي بآخر الفصل عبيت كلام كتيييييييير عنها وطالبت بحذفها من الخطة ووضع شي مفيد أحسن من الوقت اللي راح يضيع عليها ... بس ما في شكله استجابة
نحن نزلوا لنا ستدي جايد قبل النصفي وقبل النهائي عبارة عن أسئلة فقط ... نحن الطلاب من كل الفروع جمعنا بعض وجبنا اجابات لها من كتابها المعفن ودرسناها والكل بده الفكة منها ... الله يعينكم عليها
========================
إن شاء الله تكون التجربة مفصلة وتفيدكم تلاقوا بداية الطريق لكل مادة بشكل عام
بعرف كترت كلام ورغي ... بس بحب فصل بالأشياء المفيدة عموماً
لو عندكم أي استفسار أو حابين تحصلوا على روابط المواد عندي راسلوني على الخاص للروابط و اكتبوا بالتعليقات للاستفسارات
ولا تنسوا الروابط بتوقيعي لأشياء تانية مفيدة
بالتوفيق
رابط تجربة الحروب بمجموعة الفيس للفل 6 ...
هنا ...