السلام عليكم ورحمة الله وبركاته

كيف حالكم أيها الآيتيون؟ ... ... إن شاء الله تكونوا بخير وبصحة ... خصوصي بعد هل الإجازة الطويلة اللي بتفقع القلب للناس اللي سحبت على التدريب مثلي

المهم ماعلينا ... بما إني وعدت من مدة ... بظن إنها طويلة ... إني اكتب عن لفل 5 بحكم إني مخلصته .... فالآن وهنا حصرياً أقدم لكم قصتي مع هل اللفل العملاق و اللي كان بداية الاحتراف ... طبعاً الاحتراف التقني خخخخ

بالتوقيع أسفل روابط تجاربي بلفلات أخرى

لنبدأ يلا .... بسم الله الرحمن الرحيم


أولاً المواد حسب الخطة هي 5 مواد ( 4 مواد مشتركة مع باقي الفروع و مادة تخصص مافي إسلام )
راح أبدأ من السهل للتخفيف كالعادة
****************

تفاعل الإنسان مع الكمبيوتر ( IT201 _ Human Computer Interaction)

مادة سهلة جداً ... معلوماتها أغلبها عامة أو جديدة سهلة ... بما إنكم صرتوا محترفين خلص ... يعني هي من النوع الاستنباطي من خلال تعاملنا نحن مع الأجهزة المختلفة من جوالات ولابتوبات وتطبيقات مختلفة ... الشكل تبعها والخواص والتصميم وسهولته مشان المستخدم ... كم ضغطة لازم يكون في بالواجهة للوصول للمعلومات <<< هي المعلومة اللي متذكرتها بالذات لأني حبيتها ( قاعدة ال3 clicks ... راح تجي بالاختبار) .... وهيك كلام

الدراسة فيها بتكون من السلايدات وبس لأنه برأي كافية ... هيك عملت أنا ... ولو في معلومات تانية حاولوا تلقطوها من الشرح وتفتوا بالاختبار لأنو مجال الفتي فيها كبيييير جداً
الشي المميز فيها هي واجباتها ... وهي 5 مشاريع بالأحرى مو واجبات ... بتبدأ بأنك تختار فكرة لتطبيق جوال أو ويب وتبدأ تعمل عنها أبحاث وتلاقي الموجود مثلها بالسوق وهيك لحتى تعمل لها تصميم واجهة وتعمل تصحيح للأخطاء فيها ... يعني كأنك عم تشتغل عنجد بمجال تطوير التطبيقات وهاد الشي كتيير حبيته وراح يعطيكم خبرة ... بس انتبهوا للفكرة اللي راح تختاروها لأنه راح تكون نفسها طول الترم

المفروض لو شو ماكان مستواك ماتنزل فيها عن A ... لانها مساعدة لرفع المعدل ناهيك عن سهولته الشديدة .... ويعني have fun with it

***************

تحليل وتصميم أنظمة ( IT243 _ Systems Analysis and Design )


اوكي لشوف شو بتذكر عن المادة ... طيب تذكرت انو مشاعري مختلطة بالنسبة لهي المادة ... يعني مرات حسها حلوة وممتعة ... و مرات حس بدي فجرها ... بس لا تخافوا عديتها بعلامة عالية والحمد لله

نجي احكي عنها شوية واتفلسف ... المادة بشكل عام من اسمها بتهتم بكل شي له علاقة بالنظام (بقصد بالنظام أي مشروع بدك تنفذه ... ولنفرض انو مشروع صرافة للمصاري ATM )... يعني بتبدأ بمرحلة التخطيط للنظام ( يعني شو بدنا نعمل وكيف راح يكون شو راح نستخدم ) ... بعدين التحليل ( شو المتطلبات اللي بيحتاجها الزبون أو الطاقم والعمليات والأجهزة والبيئة ) ... بعدين التصميم للنظام ( يعني متل برمجة خطوات كيف راح تدخل المصاري وكيف راح تطلع والشكل تبع الصرافة ) ... آخر شي التطبيق ( تنفيذ المشروع واختباره وحساب التكاليف ونجاحه ) ... يعني وهيك من هل الكلام ... >>> المادة سهلة بس بعض النقاط صعبة متل المخططات وتحليلها

دراستها بتكون حفظ من السلايدات كافية والتست ... وبعض المصادر الخارجية لشرح المخططات لانها بتجي عليها أغلب العلامات بالاختبارات ... هي حذرتكم مشان ما تنصدموا ... والوجبات راح تكون 4 مع case study عادية وبتنحل ...

****************

الشبكات ( IT210 _ Data Communications and Networking )


المادة اللي طلع عنها اشاعات كتييير ... والناس خافت منها قبل ما تدرسها ... مابعرف ليش <<< بصراحة بعرف شوي

المادة ليش بتخوف؟؟ ... يمكن لأنه ما في مصدر لدراستها لأنه السلايدات تبعها كلها صور وعنواين بس ! ... يمكن لأنه المادة داخلة بالتخصص العميق للشبكات وبتحكي عن البروتكولات والعمليات والأجهزة المستخدمة! .... يمكن لأنه فيها أسئلة فيزياء + رياضيات لحل المسائل تبع الشبكات! ... أصلا مابعرف كيف هي المادة ممكن تكون مشتركة بس ياحرام طلاب التخصصات التانية بيوجعوا القلب ... بس نحن الآيتيين عادي هي الأشياء مو؟

المهم ...المادة طويلة 15 شابتر حفظ وفهم ... أخدت من جهدي ووقتي كتييييييير وكانت متل محور تركيز الترم ... وبما انه السلايدات متل قلتها ما فيكم تدرسوا منها ...رحت أنا سويت حالي مصطفى و عملت سلايدات مشان ادرس منها ( يعني رحت اقرأ الكتاب ولخص منه و عدل على السلايدات تبع الجامعة ... وهيك دوخة يعني ) بس رفقاتي اللي معي حبوها ودرسوا منها كمان وعجبتهم مشان هيك قررت انشرها ... وهاد رابط الموضوع بالمنتدى هون (شيء نذاكر منه .... سلايدات من تعديلي لمادة it 210) إن شاء الله تعجبكم وتستفيدوا منها ... بنصحكم فيها لأني درست بس منها والحمد لله جبت A+ >>> مصطفى من جد ( والله مو بس أنا ما شاء الله حتى المصطفيات اللي معي كمان جابوا A+ ) .... في ناس قالت انها طويلة وما عجبتها ... بس شي أحسن من ولا شي صح؟


******************

مقدمة في قواعد البيانات ( IT244 _ Database )


هي المادة بدل البرمجة هاد الترم ... ... المادة بدها فهم كتير وبدها تدريب على أمثلة مشان تتمكنوا منها ... وهي مفيدة باللفلات اللي بعد ... وما بيمشي الحال لو عديتوها على الشفة لانه بتحتاجوا بعدين ترجعوا لها مرة تانية أكيد

بتحكي عن أنواع القواعد و وكيفة ربط الجداول بداخلها و لغات التعامل معها مثل الجبر و SQL و المخططات المختلفة لتمثيلها ... عموماً المادة ممتعة بالدراسة والفهم .... هيك كانت بالنسبة لي .

الدراسة من السلايدات بتكفي مع تطبيق أكبر قدر من الأمثلة التي ممكن توصل لكم من أي مصدر ... صدقوني حاولوا تتجاهلوا مثال واحد بس لأنكم تعبتوا وشوفوا كيف راح يجي بالاختبار
الواجبات سهلة وخفيفة ... وبالنهاية مشروع لتطبيق كل اللي اشتغلتوا عليه صعب نوعاً ما ... وبس

*******************


الإحصاء (101 STAT )


المادة ... احم أمزح ... هي المادة مو صعبة بس القوانين اللي فيها كتيرة وبتلخبط شوي ... بس لو حطيتوا براسكم راح تعدوها بعلامة حلوة

الدراسة من السلايدات مع أمثلة الواجبات بتكفي ... فيها جزء منيح نظري لا تتجاهلوه لأنه بيجي منه أسئلة كتيرة ... مثل الماث اللفل اللي قبله ...بتجي الأسئلة على نمط الواجبات بالنسبة للباقي ... حاولوا تلاقوا مصدر من يوتيوب لتفهموها لو اللي راح يدركسم مو فاهم لأنه في كتير شرح للمادة بالعربي حتى ... أنا استمتعت بالمادة صراحة لأنه الدكتورة الهندية اللي درستنا كتير فهمانة والأسئلة كانت سهلة ... بس ما فهمت سبب دراستنا لهيك مادة


************************


مرة تانية ... اللي كتبته فوق بيعبر عن رأي والطريقة اللي درست فيها المواد ... إن شاء الله تفيد حدا .. كان الفصل ثقيل من ناحية كثافة المواد ... بس عاااااادي مو؟ عم نقرب بخطوات للاحتراف وخطوة للتخرج

اللي عنده سؤال يتفضل يسأل بدون خجل
موفقين

تجرربة جميله وي رب سنتنا تكون جمليه زيك ... شكرا لك مشرفتنا العزيزة ..


فالك التوفيق ي رب

الله يعطيك العافية , وشكرا على مشاركة تجربتك الجميلة, والله يوفقنا جميعا .....

منها لنجاحات اعلى يارب

-

جا بوقته :d
يعطيك العافيه

سؤال:
الليفل الخامس يتحمل مادة سادسه ثقافه؟ :d
ودي اسجل ثقافه بهالليفل.

شكراً

شكرا على ذكر تجربتك ياقميلة.