طيب بداية الترم كان فيه ذم على استاذات بشكل يخوف وطبعًا الكارثه ان اصلًا ماعندنا خيار كذا ولا كذا حنضطر ناخذ الماده معاهم بالرغم بداية الترم وحده من الاستاذات الله يسعدها قالت لنا على هذا الموضوع ونبهتنا من ان بعضهم يذموا استاذه وبكل بساطه يكون التقصير اصلا من الطالبه نفسها ولكن ما اثر كلامها كثير فيني بقد ما ياثر تجارب الطالبات نفسهم.
حابه اقولكم ان اثنين من هذولا الاستاذات اخذت معاهم اي بلس وبالاضافه اني كنت اكتب بعض الاسئله من فهمي
اما وحده منهم نجحت بدرجه حلوه لكن مستحيل لو احد سالني عن هذي الاستاذه اقول انها ظالمه فالدرجات طيب ليه ياشهد ؟ اولًا فالميد لما نقصت ماكنت عارفه نقصت في ايش ممكن منجد يكون عندي اغلاط ماتكون منقصتني كذا بس من راسها وفالفاينال صراحه مرت عليا كثير اشياء بالذات الخياري تنحت عندها مني عارفه اش هذا, يعني اصلًا الاختبار كان صعب بالنسبه ليا فممكن تكون حلولي غلط عشان كذا نقصت فوق 10 درجات
فيه مشكلتين هنا
الاولى تجي طالبه مو فاهمه الماده صح وتقول كتبت من فهمي وماحسبت الاستاذه صح واصلًا يكون فهمها غلط أو ممكن كتبت صح لكن ماكتبت اجابه كافيه سطر او سطرين فالاستاذه نقصتها
المشكله الثانيه تجي وحده مافتحت الماده ابدًا الا قبل الاختبار بيوم او يومين وماتحل كويس فالاختبار ودرجتها تكون نازله وبعدين تقول الاستاذه مو كويسه صح ممكن تكون مامشت لك ولكن اعطتك حقك صح فيه استاذات يخسفوا فالدرجات بس حاليًا حابه انبه بس على اللي يتكلموا ع الاستاذات انهم مو كويسات وتكون العله فالطالبه نفسها
نصيحه اذا كنتو مو فاهمين الماده او مقصرين فيها ابدًا لا تتكلموا ع الاستاذ\ه لان يدخل الطالب وهوا مسدود نفسه من الاستاذ وعلى ادنى شي يلوم الاستاذ وينسى نفسه بسبب انه داخل وبعقله ان الطلاب اللي درسوا معاه قالوا انه مو كويس
النصيحه الثانيه حاولوا لما تجو تسالوا عن استاذ تكونوا عارفين الطالب ومستواه طبعًا احنا فالغالب نكون نسال كيف الاستاذ\ه من ناحية الدرجات والتعامل لان فالغالب الفهم معتمدين على نفسنا
النقطه الثانيه بعد مانزلت الدرجات شفت بقروب الواتس كثير كاتبين راسبين زعلت عليهم مره
حقولكم طريقة مذاكرتي يمكن تفيدكم بس قبل كل شي كل واحد ادرى بقدرته وظروفه
اول شي ما اراكم, بالكثير اراكم حق اسبوعين ( اول باول وامورك ماشيه ) ثاني شي اول باول مو معناه اني احفظ اول باول لان حضيع وقتي وحيجي وقت الاختبار ناسيه ماني حفيظه ابدًا فاللي اسويه اعطي وقت لكل شابتر اقرا كل سلايد كم مره افهم كل شي مكتوب اذا فيه شي مو مفهوم افهم بسوال احد او بحث واترجم المهم اني امسك الشابتر بحذافيره افهمه اعرف يتكلم عن ايه وهكذا, بالنسبه للميد ماكان فيه وقت يعني كل ماده جا وقتها كنت قدني فاهمه كل شابتراتها يعني مو معلومات جديده بس حفظ وقتها. اما الفاينال كالتالي بعد ماشفت الجدول شفت ان اخر ماده اللي هيا الاي ماركتنج حيكون قبلها يومين فاللي سويته اني مامسكت هذي الماده من بعد الميد ابدًا يكفي اركز مع الاستاذه وقت المحاضره طالما انها بتشرح وطالما الماده سهله يكفي يومين عليها بالراحه بعد كذا ركزت بعد الميد على ال5 مواد الباقيه بنفس طريقة الميد لكن كان عندي وقت يمكن اسبوع قبل تبدا الاختبارات ف استغليته وبديت اذاكر حاولت اخفف من كل المواد قد ما اقدر باستثناء الاقتصاد ختمته لان طويل و كنت مرعوبه منها وفالنهايه هوا اقل درجه جبت فيه :d المهم جا وقت اختبار كل ماده كملت الجزء اللي لسا ماذاكرته ورجعت مسكت اللي ذاكرته فالاسبوع اللي قبل الفاينال وبعدها اخصص وقت بسييط مايتجاوز ساعتين في كل المواد اني اقرا فيه شابترات الميد وبكذا ان شاء الله فالكم النجاح وباعلى الدرجات شدوا حيلكم بس طالعوا فكل ماده اسالوا نفسكم هل فيا حيل اني ارجع اعيد الماده ! يمكن هذا السوال يشجعكم تشدوا حيلكم محد ناقص يعيد ماده مره ثانيه
نقطه اخيره تتكرر كل ترم مدري ليه
في الفاينال بعض الاختبارات الطلبه يقولوا كانوا جايبين من جزئية الميد اكثر من 25%
اول شي 25% معاناها تقريبا من12-13 درجه فالفاينال. انا اركز فالاختبارات اشوف قد ايش جايبين من جزئية الميد وماقد مر عليا اختبار كانوا جايبين فوق 25% من الميد يعني رجاء لا تخوفوا الدفعات اللي بعدكم.
ويعيطم العافيه
دعواتي لكم بالتوفيق
ولا تنسوني من صالح دعائكم اذا استفدتوا
وشكرًا