عرض مشاركة واحدة
قديم منذ /29-12-2018, 08:04 PM   #1

shahd_fahd
طالب نشيط

shahd_fahd غير متواجد حالياً

 

مواضيعي | ردودي

 رقم العضوية : 23122
 تاريخ الإنتساب : Aug 2016
 المشاركات : 119
 الجنس : أنثى
 مستوى التقييم : shahd_fahd will become famous soon enoughshahd_fahd will become famous soon enough
النقاط : 29

شكراً: 1
تم شكره 118 مرة في 56 مشاركة
افتراضي تجربتي في سمستر 5


السلام عليكم ورحمة الله وبركاته

أول حاجه هذا الترم التجارة والإدارة والمحاسبة مجتمعين في كل المواد عدا مادة وحده
فطلبت من زميلاتي محاسبة وإدارة يعملوا لكم رفيو عن موادكم ان شاء الله كمان يفيدكم
بالاضافة كمان اني نزلت لكم نماذج اختباراتنا وحلول واجباتي حتحصلوها فقسم كل مادة

نبدأ بالمستوى الخامس ولله الحمد

ECOM201
إدارة الكترونيه من اسهل المواد وابسطها هذا السمستر عباره عن 14 شابتر خفيفه وسهله كان اول 5 شابترات فقط فالميد. سواء فاينال او ميد الاسئله ماخرجت من السلايد ابدًا وواضحه وبعضها بديهيه يعني على سبيل المثال في الفاينال جابوا سؤال نذكر 3 مميزات حق الموضوع الفلاني لكن فالسلايد ماكان مذكور اش المميزات كانوا متكلمين عن هذا الموضوع بشكل عام لكن سؤال جدددًا سهل والكل أتوقع عرف يحله باختصار يمديك بعض الأشياء تحلها بفهمك. الاساتذه اللي سوو مراجعه كانت مفيده للمقالي. الاسايمنت كان عباره عن بروجكت مره حلو فيه تطبيق لكل اللي درسناه. عن نفسي الكتاب ما استفدت منه لهذي الماده. ماده زي كذا لاتضيعوا فيها اي بلس

MIS201
إدارة نظم معلومات ايضًا ماده تعتبر سهله اذا فهمتها فيه كم شابتر بالبدايه يشبه أي كوميرس وفيه معلومات كمان متكرره منها عباره عن 14 شابتر باستثناء شابتر 9 و 2 مو معانا فالخطه والميد كان من 1-7 بدون 2 طبعًا. اختبار الميد كان جدًا سهل وواضح وغير كذا طلعوا جابوا من نموذج السنه اللي قبلها عن نفسي ماشفته لكن البنات قالوا نسخ لصق كم شي بس غيروه فالبتالي اطلعوا على النماذج. أما الفاينال كان المقالي سهل لكن الصح والخطا والاختياري ماكانوا سهلين بنفس درجة الميد بالذات الصح والخطا كان يتطلب تكونوا فاهمين كويس على سبيل المثال فالصح والخطأ جابوا مصطلح وتعريفه موجود هذا المصطلح فالسلايد بس مو نفس التعريف لكن لو فاهم اش يعني حتعرف الجواب وأيضا فالسلايد عندنا مصطلح ذاكرين بس عيوبه ومميزاته ولكن فالصح والخطا جابوا لنا المصطلح وتعريفه فلازم تكونوا فاهمينه واتوقع والله اعلم انها كانت من التست. الاساتذه اللي سوو مراجعه كانت مفيده للمقالي. الاسايمنت عددهم 4 عباره عن كيس ستدي وعليها اسئله وكانت نفس حق السنه اللي فاتت فممكن تحصلوا نماذج حلول ولكن انتبهوا من النسخ واللصق عشان ماتحصلوا صفر بالراحه تقدروا تضمنوا 20 حق الواجبات اذا جاتكم نفسها عندكم نماذج حلول تقدروا تشوفوا كيف طريقة الحل وتبدأو تصيغوها بطريقتكم. السلايدات كافيه ووافيه ممكن لو شي مو فاهمه ترجع للكتاب لفهم اكثر فقط. ايضًا نهاية كل شابتر فيه كيس ستدي وسلايد عن الاي تي مو معانا.

MGT301 -OB-
سلوك تنظيمي ماده سهله صراحه وواضحه ولكن عيبها طويله بالذات جزئية الميد كانت 10 شباتر وبعد الميد 7 كمان. فيه نوت فسلايدات الباوربوينت اضفتها انا عالسلايد لكن صراحه مهي مفيده كل شي واضح فالسلايدات وماراح تحتاجوها للمذاكره صح فيها امثله واشياء حلوه لكن السلايدات كافيه والشابترات كثيره و مو ناقصه السلايدات زحمه. طبعًا كتابنا نسخة 2012 زي ماهو مكتوب فالبلاك بورد غلافه اخضرحتحصلوا في هذا الكتاب اسئلة اختياري نهاية كل شابتر وحلولها نهاية الكتاب مهمه جدًا فالميد والفاينال نسخ لصق منها يعني لو ضلوا وجابوها لكم تضمنوا 10 فالميد و 20 فالفاينال لو ذاكرتوا هذي الاسئلة. بالنسبه للميد كانت أسئلة المقالي غير متوقعه ابدًا وبعدين اكتشفنا انهم جابوا من الاسئله اللي تكون بداية كل شابتر وتكون موجوده كعناوين فوق السلايدات. اما الفاينال ماجابوا منها بس الاسئله كانت أوضح من الميد وماطلع أي شي من برا السلايد وجابوا سؤالين فالمقالي فالشورت من الميد لكن جابوا أشياء جدًا سهله اشوفها. طبعًا الماده تحتاج وقت للمذاكره لان تقدروا تجيبوا فيها درجه عاليه اذا ما اهملتوها. الكتاب كمان استفدت منه على قولتهم يحط النقاط فوق الحروف مثلأ فالسلايدات تحصلوا 6 سلايدات نحفظها كتعاريف بس افتح الكتاب اكتشف انها تعداد بس هذا الشي اللي استفدته غير كذا السلايد كافي.


MGT311 -OM-
إدارة العمليات عبارة عن 16 شابتر اول 9 فالميد الماده تحتاج فهم صراحه يعني لازم اول بأول الاختبار مو صعب اذا كنت فاهم اقل شي بعد كل أسبوع تتصفحوا السلايد عشان تشوفوا اش يحتاج فهم وعشان لايتراكم عليكم. فالاسايمنتات يجيبوا كثير من الكتاب نسخ لصق حتى نفس الأرقام. الاختياري سواء ميد او فاينال واضح جدًا من السلايد ونفس الشي المقالي لكن فالفاينال كان شويا المقالي يحتاج تركيز مو نفس سهولة الميد نزلت لكم اسئلتنا اللي جاتنا عشان تشوفوا اش اقصد. الكتاب كمان ممكن تحتاجوه اذا فيه شيء مافهمتوه من السلايد فقط. بالنسبه للاسايمنتات ذاكرناها لكن ماجا منها فالاختبارات. غير كذا ترا كوردنيتور الماده تغير يعني محا تستفيدوا مره من النماذج ماجانا شبهها.

ECON201
الاقتصاد الكلي طبعًا هنيئًا للي اخذوا الاقتصاد الجزئي لان في الشابترات اللي قبل الميد فيه جزئيه حتكون سهله عليكم اذا كنتو ماخذينه. الماده طويله وتحتاج فهم وثقيله يعني ايش ؟ تحتاج مذاكره اول بأول ويادوبك. عباره عن 23 شابتر باستثناء شابتر 5 و 22 مومعانا في الخطه والميد كان لشابتر 12 طبعًا من دون 5. جزئية الميد كانت اسهل من الفاينال سواء كمذاكره او فالاختبار فشدوا حيلكم واضمنوا اكبر درجات فالميد. الكتاب ما استفدت منه غير وقت الاسيمنتات حتى النوت ايضًا مارجعت له السلايد كافي ( بالنسبه لكتابنا ارقام الشابترات مو بنفس ترتيبنا على سبيل المثال عندنا شابتر 12 فالكتاب ممكن يكون رقمه 20 وهكذا فشوفوا فالفهرس عنوان الشابتر مو رقمه). فيه حاجه بنصحكم فيها تمنيت اني سويتها كان ممكن اني اخذ درجه اعلى بالذات لجزئية الفاينال وهيا مذاكرة التست بانك هوا طويل وطويل جدًا لكن كانوا يجيبوا الاسئله منه فممكن بعد كل ويك تشوف السلايد ايش يحتاج فهم وبعدها تمسك التست, انا قلت لكم اول بأول التست لان قبل الاختبار محا يمديكم تمسكوه مره طويل يادوبك السلايد بالاضافه لما تمسكوا التست لازم تفهموا كل جواب ليش اخترناه لو ماكنتوا فاهمين بالراحه يجي وقت الاختبار وتكونوا نسيتوا اش الجواب. الميد كان الاختياري تقريبًا سهل يمكن سؤالين اللي فيها كلام شويا بس اما الفاينال بالرغم اني حاولت افهم الماده قد ما اقدر واذاكرها اول بأول الا انها كانت صعبه جدًا, أشياء بسيطه اللي عرفتها اقل من النص يعني. فالميد ماكان فيه رسم فقط جابوا رسمه واحنا نشرح عليها اما فالفاينال كان فيه رسم. بالنسبه لاسئلة التمارين اللي تكون بوسط السلايدات ذاكروها يجيبوا منها فالميد والفاينال ونفس الأرقام وعمومًا أي شي في حسابات لاتهملوه يجي بكل الاشكال لونق شورت اختياري. بالنسبه للكويزات ماجابوا شي منها فالاختبارات.

ECOM302222
تسويق الكتروني احلى ماده هذا الترم وبلا منازع ( بكل تواضع مو عشانها مادة تخصصي) بس منجد اول ماده ادرسها وأقول هذي ممكن اطبق أشياء منها جميله بشكل يجنن وكمان الاستاذه تلعب دور اكيد كانت تشرح كل كلمه ومتمكنه جدًا من شرح الماده. الماده سهله واختبارها يجنن وسلايداتها تجنن عباره عن 16 شابتر 8 منها جزئية الميد. فيه كثير سلايدات كلها رسوم بيانيه مثلًا او إحصاءات مومعانا وبعضها كيس ستدي يكونوا كاتبين اسم شركه ومطبقين عليها شي برضوا مو معانا. فيه بعضها صح تكون قرافات لكن تكون معانا انتوا من المعلومات اللي فيها حتعرفوا وكمان لما تشوفوا الأستاذ\ه ماشرح او تجاوزها حتعرفوا اش القرافات اللي معانا وتذاكر. الميد او الفاينال كانوا يجننوا وسهلين الحمدلله. لاتتساهلوا وتمسكوها ليلة الاختبار وتضيعوا الاي بلس فيها لانها تنجاب وبسهوله. العله كان الاسايمنت ان شاء الله مايجيبوا لكم نفسه. بالنسبه للميد جابوا كثير اشياء من نموذج الدفعه اللي قبلنا فشوفوا نموذجنا يمكن تستفيدوا.

ACCT201
مقرر محاسبة مالية هو عبارة اكاونتج ١٠١ على مستوى اعلى شوي بيجمع بين المحاسبة العادية والمالية وقيمها الزمنية عشان يصير تسجيل المعاملات بقيمتها المناسبة في وقتها المناسب ، المقرر عبارة عن ١٤ شابتر حذفو منها شابتر ٦ طبعاً الشابتر المحذوف هو المشبع بقوانين القيم الزمنية للمال. توزيع الدرجات نفس المحاسبة ١٠١ ١٥ درجة واجبات وعددهم ٤ .. ١٠ درجات على كويز .. ٢٥ ميد تيرم و ٥٠ فاينل. كبداية الشباتر الاولى ١٠١ بحت خصوصاً شابتر ثلاثة من بدايتو لنهايتو ١٠١ من بعد شابتر ثلاثة تبدا تلاحظ التغيير في المحاسبة وبعض المعلومات تبدا تتغير ، لكن مش صعبة ابداً بالعكس واضحة وممكن تلقى مقاطع باليوتيوب اذا ماناسبك شرح الاستاذ وتفهم بنفسك ، المادة تتطلب مراجعة اول باول وفهم مش حفظ الحفظ يكون لاسماء الحسابات الجديدة فقط الباقي فهم لان اختبارات المادة ما تجي دايركت في اغلب الاحيان بتجي بالفهم وهذا الشيء صدمني في الميد واتوقع السبب يرجع لاننا طلعنا مستوى اعلى في المحاسبة. المادة لطيفة وتعتمد على الشخص اللي يدرسك هيا لو كان لطيف المادة حتلطف ولو كانت صعبة حتكرهك نفسك.

MGT312
الماده عباره عن 5 شابترات 3 منها فالميد مره سهله ومباشره ممكن تصادفوا مصطلحات تضطروا ترجعوا للكتاب تفهموها أكثر. اسئلة الميد والفاينال كانت مباشرة. الماده مليانه تعدادات فالبتالي تحتاج حفظ كويس عشان ماتلخبطوا بينهم. ايضأ لازم تكونوا فاهمين شرح كل تعداد لان فاللونج مايكفي انك ترصي التعداد بس لازم شرح. فالاختياري بالميد جا زي اللي بالكتاب نسخ لصق. بنهاية كل شابتر فيه شي بما معناه فائدة هذا الشابتر بالعمل او شي زي كذا هذا لا تهملوه لان جابوا منها سؤال فالمقالي لونق باول شابتر عن crowdsourcing.


للموضوع تكمله...








التوقيع
العبقري هو ليس شخص يعرف كل الإجابات
العبقري هو من لديه الصبر ليبحث عن كل الإجابات
لاتنسوني من صالح دعائكم
Twitter: 97_shahdd
  رد مع اقتباس
3 أعضاء قالوا شكراً لـ shahd_fahd على المشاركة المفيدة: